Lee informasaun ne’e iha lia-ingles
Artigu ida-ne’e hakerek husi Juvita Pereira Faria nu’udar parte ida husi projetu EngageMedia nian Advokasia no Komunikasaun Juventude ba Liberdade Internet, ne’ebé ho objetivu atu habelar konsiénsia no envolvimentu iha asuntu direitu dijitál entre advogadu foin-sa’e sira iha Azia-Pasifiku.
Juvita nu’udar ativista foin-sa’e ida-ne’ebé apaixonadu kona-ba empoderamentu feto no igualdade jéneru. Nia forma Programa Dezenvolvimentu Lideransa Juventude Timor-Leste (YLDP-TL), grupu foin-sa’e ida-ne’ebé fornese formasaun lideransa gratuita ba joven mane no feto sira. Agora dadaun nia organiza podcast ida no hala’o esforsu seluk kona-ba edukasaun literasia dijitál entre foin-sa’e Timor-Leste sira.
Nu’udar nasaun foinsa’e ho kompozizaun idade joven kuaze liu-husi pursentu 50 iha Timor-Leste, entre 15-25. Kategoria idade idane’e konsideradu nu’udar utilizadór ativu ba média sosiál online. Konsidera mós hanesan nasaun ida-ne’ebé iha infrastrutura dijitál ne’ebé seidauk dezenvolve ho diak no ninia populasaun vulnerável tebes ba ataka hasoru sidadaun sira-nia direitu umanu no dijitál, ameasa ba sira-nia seguransa dijitál, asédiu online, no konsumu falsa informasaun sira. Enkuantu iha Timor-Leste rede internét iha teritóriu nasionál kiik (fraku tebes) no kustu ne’e aas liu kompara ho nasaun sira seluk iha Sudeste Aziatiku.
Foinsa’e Timor-oan hala’o papél importante iha era evolusaun dijitál ohin loron, liu-liu iha média sosiál sira. Foinsa’e sira sai hanesan inventór prinsipál iha era teknolojia ida-ne’e no sira asosiadu liu ho konteúdu eletróniku sira ne’ebé sai ona fontes rendimentu iha nasaun dezenvolvidu barak iha dijitál no teknolojia. Artigu ida-ne’e ezamina papél juventude sira-nian nu’udar advogadu direitu dijitál ba jerasaun hotu-hotu. Liu-liu, foinsa’e sira tenke sai nu’udar kampiaun ba literasia dijitál no edukasaun, liuhusi ne’e bele hasa’e konsiénsia liután kona-ba importánsia privasidade pesoál nian, asesu ba informasaun ne’ebé konfiável, no protesaun ba imprensa no liberdade espresaun, hanesan hakerek ho klaru iha artigu 40 iha Konstituisaun Nasionál Timor-Leste.
Liberdade espresaun online Ameasadu
Maske Timor-oan goja direitu ba liberdade imprensa iha Timor-Leste, utilizadór internét sira sei luta nafatin hasoru konetividade internét no laiha vontade polítika atu proteje no promove direitu dijitál iha nasaun idane’e. Mekanizmu legál sira foin lalais ne’e, hanesan re-afirmasaun ba defamasaun kriminál iha Kodigu Penal iha 2020 no esbosu Lei Siber-nétika, mós iha limitasaun ba liberdade espresaun online no ameasa diskursu demokrátiku.
Kazu balun kona-ba krítika husi joven sira iha média sosiál ne’ebé mosu tanba diskusaun kona-ba lei siber-netika. Iha esperiénsia ohin loron, foinsa’e Timor-oan sira hato’o sira-nia hanoin kritikamente iha média sosiál no diskute kazu espesífiku sira hanesan partisipasaun polítika, dezempregu foinsa’e sira, no dezenvolvimentu ekonómiku, maibé sira hetan ameasa no kaptura kedas no mesmu laiha obrigasaun legal atu kaptura ba aktu ida-ne’e.
Iha tinan 2023 polísia nasionál kaptura ativista joven feto ida naran Variana tanba kritikamente publika estatementu hasoru lider superiór sira iha RDTL. Maibé, kapturasaun ne’e la-provadu bele kastigu durante prosesu investigasaun. Variana nia publikasaun konsidera hanesan argumentu kritiku komún ida iha média sosiál, ne’ebé sai parte ida husi liberdade imprensa.
Variana nia kazu la’ós baibain. Iha Revizaun Periodika Universal Nasoins Unidas nian iha tinan 2022, Konsellu Direitus Umanus Nasoins Unidas nian enumera violasaun direitus umanus no dijitál sira iha nasaun ne’e, ne’ebé sai hanesan ameasa ba liberdade espresaun no asosiasaun. Enkuantu rekomendasaun ne’e foka liu ba direitu komunikasaun sosiál nian, sidadaun hotu-hotu – liuliu foinsa’e vokál sira – tenke hetan direitu hanesan.
Foinsa’e nia konsiensia no prioritizasaun ba literasia dijitál
Importante duni atu fasilita foinsa’e sira atu komprende no aproveita utilizasaun dijitál hodi expresa no promove sira-nia liberdade, protesaun ba seguransa sibernétika, hahalok asédiu online, no mós promove inkluzaun dijitál iha Timor-Leste. Liu husi forñese asesu ba informasaun no rekursu sira kona-ba direitu dijitál, asegura katak komunidade marjinalizadu, inklui feto, labarik no populasaun rurál sira, atu la-husik sira iha kotuk iha era evolusaun dijitál idane’e.
Atividade promosaun ida hanesan ne’e mak JPF podcast, iha ne’ebé autór artigu ne’e rasik involve no inisia. Podcast no ninia atividade diskusaun sira hahú implimenta iha fulan Fevereiru tinan 2023, ninia objetivu mak atu hasa’e konsiénsia entre foinsa’e sira kona-ba evolusaun no inovasaun teknolojia ne’ebé mosu iha rejiaun, liu-husi formasaun dijitál, kolókiu públiku, no video podcast online. Eventu dahuluk ne’e hala’o iha loron 30 fulan-Setembru tinan 2023 ho tema “Direitu Dijitál: Oportunidade no Dezafiu sira ne’ebé foin-sa’e hasoru wainhira utiliza média sosiál sira iha Timor-Leste.” Eventu ne’e ho objetivu atu hasa’e foinsa’e sira-nia koñesimentu no abilidade hodi fasilita sira atu foti desizaun ne’ebé informadu no oinsá uza dijitál ho seguru, fiar-an, no reziliente.
Inisiativa lubun hahú implimenta iha tinan balun ikus ne’e hodi promove programa sira konaba hasa’e konsiénsia dijitál no literasia ba foinsa’e sira. Ezemplu inisiativa idatán maka “Youth Accelerator Lab” ne’ebé hetan apoiu husi UNDP iha Timor-Leste atu promove joven sira-nia kapasidade hodi partisipa iha evolusaun dijitál no teknolojiku. Inisiativa dijitál ida-ne’e foinsa’e sira maka lidera no explora aprosimasaun baze ba abilidade ne’ebé excelente oinsá halo operasaun ba mundu online, inklui ninia objetivu edukativu sira.
Edukasaun direitu dijitál ne’e esensiál tebes iha Timor-Leste atu fó kbiit ba ema ida-idak atu proteje sira-nia privasidade, promove liberdade espresaun, promove inkluzaun dijitál no seluk tan. Ha’u hein katak inisiativa foin-sa’e sira hanesan ne’e sei hetan rezultadu di’ak no kontinua moris-di’ak.
